Hafratindur

Hafratindur er með hæstu tindum Dalanna en hann er 923 m. Tröllakirkja er hæst 1001 m en hún stendur á sýslumörkum Dalasýslu, Strandasýslu og Mýrasýslu. Gamalhnúkar er þar á eftir 940 m.

Hafratindur var kosinn fjall Dalanna af Dalamönnum árið 2013 og stendur hann vel undir þeim titli þar sem hann stendur formfagur og tignarlegur á mörkum Skarðsstrandar, Saurbæjar og Hvammssveitar. Hafratindur er auðþekktur þar sem hann gnæfir yfir önnur fjöll og sést hann víða að frá mörgum sjónarhornum.

Víðsýnt er af fjallinu og segir sagan að útsýni sé yfir sjö jökla af tindinum. Hafratindur er auðveldur uppgöngu, gott aðgengi er að honum og gangan talin hæfileg áskorun venjulegu fólki.

GPS punktar
N65° 18' 47.620" W22° 1' 4.115"
Póstnúmer
371
Vegnúmer
590