Tjaldsvæði

Tjaldsvæðið Á á Skarðsströnd

Eldra tjaldsvæðið er staðsett á fallegum stað í þéttum birkiskógi nálægt Ártindum sem er falleg klettamyndun. Nýtt tjaldsvæði hefur verið tekið í notkun sem er á heimatúni við bóndabæinn Á.

Við eldra tjaldsvæði er klósettaðstaða og vaskar en einungis kalt vatn í boði. Á heimatúni bóndabæjarins Á er búið að endurgera mjólkurhúsið sem hreinlætisaðstöðu með 3 klósettum og heitu og köldu vatni. Rafmagn er í boði á túninu og 24 innstungur eru þar í tveimur kössum. Þar er aðstaða til að elda og borða innandyra en þar er eldavél og örbylgjuofn.

Fallegur staður við sunnanverðan Breiðafjörð þar sem hægt er að njóta fallegra gönguleiða ásamt öllu því nátturulífi sem Breiðafjörður hefur uppá að bjóða.

Sundlaug Tálknafjarðar

Íþróttamiðstöð Tálknafjarðar býður upp á ýmsa afþreyingu. Þar er 25 metra útilaug, tveir heitir pottar, sauna, kaldur pottur, vaðlaug og rennibraut. Í húsinu er einnig að finna tækjasal og stóran sal sem hægt er að leigja.

Við íþróttamiðstöðina er tjaldsvæði Tálknafjarðar en það er opið frá 1. júní - 1. september. Á tjaldsvæðinu er eldhúsaðstaða allan sólarhringinn, útigrill, salerni og sturtur. Einnig er hægt að setja í þvottavél og þurrkara gegn gjaldi.

Allir hjartanlega velkomnir, alltaf heitt á könnunni.

Hægt er að hafa samband á ýmsan hátt:
Sími: 456-2639
Netfang: sundlaug@talknafjordur.is
Facebook síðan okkar er hér:

Vetraropnun: 09.00-19.00 virka daga og 11.00-14.00 á laugardögum, lokað sunnudaga

Sumaropnun: 09.00-21.00 virka daga og 10.00-19.00 um helgar.

ATH: Sölu lýkur 30 mínútum fyrir lokun. Gestir eru góðfúslega beðnir að fara uppúr lauginni 15 mínútum fyrir lokun.

Tjaldsvæði Súðavíkur

Tjaldsvæðið er staðsett ofan til við Samkomuhúsið og er keyrt inn á svæðið frá innri enda Túngötu. Útsýnið af tjaldsvæðinu er víðáttumikið og stórbrotið með sýn á fjallið Kofra í vestur inn Álftafjörðinn og Kambsnesið í austri, ásamt því að hafa í augsýn eyjuna Vigur sem er einn vinsælasti ferðamannastaður Súðavíkurhrepps.

Tjaldsvæðið í Súðavík er nýtt og glæsilegt en það var tekið í notkun árið 2005. Slétt og gróið tjaldsvæði sem er slegið vikulega. Þjónustuhúsið er opið 24 klst á sólarhring og er með góðri inniaðstöðu, m.a. tvö salerni með vaski og heitt og kalt vatn. Salerni með sturtuaðstöðu fyrir fatlaða. Skolvaskur með heitu og köldu vatni, þurrkukassar. Næg sorpílát, útiborð og bekkir. Stutt er í alla þjónustu frá tjaldsvæðinu.
Tenglakassar með venjulegum tenglum og 3ja pinna tenglum. Aðstaða til losunar affallsvatns og seyru af ferðavögnum.
Stór fjölskyldugarður með fjölda góðra leiktækja í um 5 mínútna göngufjarlægð. Daglegt eftirlit umsjónarmanns og góð umhirða. Um 17 km. frá Súðavík til Ísafjarðar.

Salerni með sturtuaðstöðu fyrir fatlaða,skolvaskur með heitu og köldu vatni, þurrkukassar,útiborð og bekkir, tenglakassar með venjulegum tenglum og 3ja pinna tenglum. Daglegt eftirlit umsjónarmanns og góð umhirða.

Grettislaug

Á Reykhólum má finna frábæra sundlaug sem heitir Grettislaug. Við hlið sundlaugarinnar er að finna tjaldsvæði sem er opið yfir sumarið.

Ferðaþjónustan í Djúpadal

Í Djúpadal er fjölskyldu rekin ferðaþjónusta. Boðið er uppá gistingu.

Gamli bærinn
í gamla bænum eru 3 tveggja manna herbergi og 1 eins manns herbergi. Sameiginleg salerni og eldhús. Hægt að leigja allt húsið eða stök herbergi.

Þórishólmi
Sér hús sem stendur nálægt sundlaug. Húsið er 48fm 4 manna með 2 herbergjum. hjónaherbergi með tvíbreiðurúmi og kojuherbergi. Einnig er svefnsófi í stofu. Í húsinu er fullbúið eldhús og baðherbergi með þvottavél.

Stúdióíbúð í enda á sundlaugarhúsi herbergi fyrir 2 með lítilli eldunaraðstöðu og salerni.

Einnig bjóðum við upp á gistingu í 4 kofum á tjaldstæðinu hver kofi er 14fm svefnpláss fyrir 4. Borð, stólar,rafmagn og hiti. ATH einungis svefnaðstaða með aðgang að hreinlætisaðstöðu og þjónustuhúsi á tjaldstæði.

Allri innigistingu fylgir aðgangur að sundlaug og heitum potti.

Boðið er uppá svefnpokagistingu eða uppábúin rúm.

Tjaldsvæðið Skriðan Djúpadal
 Nýtt tjaldsvæði sem er enn í uppbyggingu, góð aðstaða fyrir tjöld og ferðavagna. Salerni, sturtur, heitt og kalt vatn, aðstaða fyrir uppvask, seirulosun, 150 fm aðstöðu hús og nóg af rafmagni og heitu vatni.

Sundlaug
 Lítil innisundlaug með heitum potti er á staðnum.

Opið allt árið

Hótel Heydalur / Ferðaþjónustan í Heydal

Sveitahótelið Heydalur er í 130 km fjarlægð frá Ísafirði og 320 km - 340 km fjarlægð frá Reykjavík eftir því hvaða leið er valin. Veitingasalur, sem er í gamalli hlöðu, rúmar 70 - 100 manns og fundaraðstaða er fyrir 10 - 40 manns. Boðið er upp á gistingu fyrir 59 manns í átta tveggja manna og einu þriggja manna herbergi í flokki 3 og átta tveggja manna og tveimur þriggja manna herbergjum í flokki 4 öll með sér baðherbergjum ásamt þremur sumarbústöðum, annars vegar 10 manna og hins vegar 4 - 5 manna. Gott tjaldsvæði sem er opið frá 1. júní fram í októberlok.

Gnægð afþreyingar er í boði. Lítil sundlaug í suðrænu gróðurhúsi, heitur frumlegur pottur og náttúrulaug vígð af Gvendi góða. Kajak og hestaleiga með leiðsögn við allra hæfi, bæði styttri ferðir og dagsferðir. Veiði í vötnum. Á veturna snjóþrúgur og gönguskíði. Falleg gönguleið um dalinn sem eitt sinn hýsti 13 bæi. Friðaður birkiskógur. Fjölbreytt fuglalíf og plöntugróður. Fugla og plöntuspjöld eru til fróðleiks.

Veitingasalurinn er öllum opinn. Boðið er upp á fjölbreyttan matseðil, þar sem áhersla er lögð á mat úr héraði, heimaræktuðu grænmeti og nýveiddan silung úr eigið eldi. Veitingastaðurinn er með vínveitingaleyfi.

Á tjaldsvæðinu er snyrtiaðstaða með heitu vatni, þrjú kvenna og karla klósett og sturtur sitt hvoru megin. Rafmagn fyrir húsbíla og tjaldvagna. Leiksvæði bæði fyrir börn og unglinga. Frábært umhverfi til göngu og leikja í kjarrinu.

Hleðslustöð fyrir rafmagnsbíla

Gisting: 3 hús, 19 herbergi, 59 rúm

Hótel Laugarhóll

AÐSTAÐA

Hótel Laugarhóll er heimilislegt, sveitahótel í gróðursælum dal á Ströndum, miðja vegu milli Ísafjarðar og Reykjavíkur. Boðið er upp á gistingu í eins, tveggja og þriggja manna herbergjum, með eða án sér baðs. Einnig er tekið er á móti hópum, allt að 40 manns í uppbúin rúm. Á Laugarhóli er að finna notalega setustofu með nettengingu, veitingastað, íþróttasal og gallerí, sundlaug og heitan pott. Skammt frá hótelinu er tjaldsvæði með rennandi vatni og salernum. Tjaldsvæðið er opið frá 1. júní til 1. september.

Utan háannatíma hentar staðurinn einstaklega vel til funda-, námskeiða- og ráðstefnuhalds og ekki síður sem æfingabúðir fyrir kóra, leik- og íþróttahópa, björgunarsveitir eða gönguskíðagarpa,

AFÞREYING

Við hótelið stendur Gvendarlaug hins góða, ylvolg sundlaug, með náttúrulegu heitu vatni (32°C) og náttúruleg heit uppspretta (42°C), vinsæll viðkomustaður hjá lúnum ferðalöngum. Í næsta nágrenni eru fjölbreyttar og fallegar gönguleiðir, silungsveiði, hestaleiga, sjóstangveiði og lundaskoðun, ósnert og víða stórbrotin náttúra og ævintýralegar rekafjörur sem eru eitt helsta tákn Strandasýslu.

VEITINGASTAÐUR

Boðið er uppá veitingar í björtum og notalegum borðsal með útsýni yfir sveitina. Þar má gæða sér á bragðgóðum, heimilislegum mat úr héraði í bland við framandi rétti. Á boðstólum er að jafnaði ferskt sjávarfang, heimalagaðar súpur og nýbakað brauð, ásamt grænu salati og kryddjurtum úr garðinum, að ógleymdum girnilegum eftirréttum.

KOTBÝLI KUKLARANS

Strandir hafa löngum verið kenndar við galdra og í Bjarnarfirði bjó Svanur galdramaður á Svanshóli sem getið er í upphafskafla Njálu. Kotbýli kuklarans er annar áfangi Galdrasafnsins á Hólmavík og stendur við hlið Gvendarlaugar. Það sýnir vel þær aðstæður sem almúgafólk á Ströndum bjó við á tímum galdrafársins og fátæklegur aðbúnaðurinn útskýrir ef til vill þörf þess til að sækja sér styrk í kukl.

GVENDARLAUG HINS GÓÐA

Sundlaugin á sér merka sögu en hún var byggð á fimmta áratug síðustu aldar með sameiginlegu átaki bænda úr hreppnum. Nýleg sundskýli eru við laugina og í anddyri þeirra er sýning sem greinir í máli og myndum frá byggingu laugarinnar.

GVENDARLAUG HIN FORNA

Skammt ofan við sundskýlin er Gvendarlaug hin forna, náttúruleg heit uppspretta, blessuð í byrjun 13. aldar af Guðmundi góða fyrrum Hólabiskupi. Hún er talin búa yfir lækningamætti og er nú friðuð og í umsjá Þjóðminjasafns Íslands.

STAÐSETNING

Frá Reykjavík er rúmur þriggja stunda akstur (258 km) að Laugarhóli, gegnum Borgarnes og Búðardal til Hólmavíkur. Þaðan liggur leiðin fyrir botn Steingrímsfjarðar og yfir Bjarnarfjarðarhálsinn. Hótel Laugarhóll er við veg nr. 643.

Hveravík/Söngsteinn !

Hveravík er lítil ferðaþjónusta við samnefnda vík á norðanverðum Steingrímsfjörður. Uppbygging á svæðinu hófst árið 2017 og nýtir starfsemin heitt vatn í eigu jarðarinnar.

Á Hveravík er rekið lítið en vel búið tjaldsvæði, opið allt árið, með plássi fyrir 20-30 ferðabíla og tjöld. Þar er rafmagnstenging, snyrtiaðstaða, sturtur og heitur pottur með útsýni yfir fjörðinn. Gestaaðstaðan Söngsteinn býður upp á inniaðstöðu til að borða og fullbúið eldhús.

Yfir sumartímann er boðið upp á kajakleigu og hvala-, fugla- og náttúruskoðun í Steingrímsfirði, þar sem stutt er á miðin og sjór oft lygn. Á jörðinni er einnig gróðurhús, auk hesta og hæna sem hafa vakið ánægju meðal gesta.

Hótel Bjarkalundur

Hótel Bjarkalundur í Reykhólasveit stendur í fögru og stórbrotnu umhverfi við þjóðveginn milli Berufjarðar og Þorskafjarðar. Það var byggt árið 1945-1947 og er elsta sumarhótel landsins. Frá Bjarkalundi liggja vegir til allra átta: suður til Reykhóla, norður til Hólmavíkur og Ísafjarðar og vestur á suðurfirðina þar sem við blasir íslensk náttúra í sinni fegurstu og dulmögnuðustu mynd. Fjölmargar gönguleiðir eru við Bjarkalund. Ferðamálasamtök Vestfjarða hafa gefið út ýmis kort og handhægar leiðarlýsingar á þessu svæði.

Skammt frá Bjarkalundi er afleggjarinn til Reykhóla, sem liggur um hina blómfögru Barmahlíð. Rétt hjá Bjarkalundi er Berufjarðarvatn og í það rennur Alifiskalækur út í Þorskafjörð. Eru þar fyrstu heimildir um fiskirækt á Íslandi. Merkileg og falleg náttúrufyrirbæri eru í næsta nágrenni við Bjarkalund. Vaðalfjöllin gnæfa tignarlega norðan við hótelið. Frá Bjarkalundi upp að Vaðalfjöllum er góð gönguferð. Þar má skoða þessa stórfenglegu náttúrusmíð. Hægt er að fara alla leið upp og notið hins einstæða útsýnis úr rúmlega 500 metra hæð. Þar sér niður á Þorskafjörðinn, en við fjarðarbotninn voru Kollabúðafundir haldnir á 19 öld.

Hótel Flókalundur

Hótel Flókalundur er lítið fjölskyldurekið sumarhótel í Vatnsfirði á sunnanverðum Vestfjörðum, um það bil 6 km frá Brjánslæk þar sem ferjan Baldur kemur að landi. Hótelið er miðsvæðis á Vestfjörðum og stutt í margar af helstu náttúruperlum landsfjórðungsins.

Vatnsfjörður er friðland og þekktur fyrir náttúrufegurð og fjölbreytt lífríki. Þar er mikil veðursæld og því gaman að njóta útiveru í gróðurríkum firðinum.

Sendu okkur tölvupóst til að fá nánari upplýsingar.

Hótel Flókalundur er opinn frá 20. maí - 15. september

Gisting
Hótel Flókalundur er heimilislegt sveitahótel með 27 notalegum eins og tveggja manna herbergjum. Öll herbergin eru með sér baði (wc/sturta), auk þess sem rúmgóð setustofa með sjónvarpi er á hótelinu. Hjólastólaaðgengi er í tveimur af herbergjunum.

Veitingar
Veitingasalur er opinn frá 7:30 til 23:00. Morgunverðarhlaðborð er frá 7:30 til 10:00 og í hádegi er boðið upp á rétt dagsins ásamt smáréttaseðli sem hægt er að panta af allan daginn. Hægt er að fá mat af kvöldverðarmatseðli og smáréttaseðli til 21:00. Barinn er opinn til 23:00.

Bensínstöð
Hægt er að kaupa eldsneyti af sjálfsala.

Tjaldsvæði
Tjaldsvæði er stutt frá hótelinu þar er góð aðstaða fyrir tjöld, tjaldvagna og fellihýsi. Hægt er að komast í rafmagn og í þjónustuhúsi eru salerni, vatn, sturtur og aðstaða fyrir uppvask.

Dalahótel

Dalahótel er fjölskylduhótel staðsett í fallegum og rólegum dal, aðeins einum km frá þjóðvegi 60. Staðurinn er frægur frá fornöld, en þar bjó Guðrún Ósvífursdóttir sem var ein af aðalpersónum Íslendingasagna. Hótelið er staðsett við rætur fjalls þar sem þú getur notið ósnortinnar náttúru með fjölda gönguleiða við allra hæfi. Í lok dags er hægt að slaka á í Guðrúnarlaug, sem er náttúrulaug staðsett rétt ofan við hótelbygginguna, eða í heitu pottunum og sundlauginni á hótelsvæðinu.

Veitingastaður Dalahótels er opinn öllum á eftirfarandi tímum:

Morgunverður: 8:00 - 10:00.

Hádegisverður: 12:00 - 14:00.

Kvöldverður: 18:00 - 21:00.

Dalahestar

Dalahestar er lítið fjölskyldu rekið fyrirtæki sem bíður upp á sérsniðna reiðtúra í fallegu nærumhverfi Hvammsfjarðar. Við bjóðum einstaklingum og litlum hópum að upplifa einstaka náttúru og útsýni.

Vinsamlegast hafið samband vegna ferða og bókana.